【A&M Diary】平时喺香港食韩国菜，店内有唔少靓仔oppa，够晒养眼，真系视觉嘅一大享受。但位于旺角嘅韩烧大叔，店名就讲到明只系得大叔。虽然无oppa，但都唔洗失望，反而可以专注韩烧大叔嘅出品呢！
韩式泡菜、韩式小食
韩烧大叔嘅午餐提供任饮任食嘅韩烧选择，但今日胃口唔算强大，所以就叫咗韩式定食。午市套餐包每人三款韩式泡菜或韩式小食，包括传统韩式泡菜、韩式白萝卜、韩式大豆芽、韩式薯仔、韩式炒粉丝等。
泡菜猪肉汤、韩式萝卜汤
除咗泡菜小食，午市定食仲有餐汤。泡菜猪肉汤、韩式萝卜汤都系充满韩式风味嘅选择，一款带有微辣，另一款清甜。
韩式肥牛部队锅
部队锅嘅材料丰富：午餐肉、肠仔、鸡蛋、鱼糕、肥牛、冬菇、金菇、蔬菜、韩式年糕及韩国面等。一开始食嘅时候仲略嫌唔够辣，点知越煮越辣。呢个部队锅嘅份量十足，一个人肯定食唔晒。
