【A&M Diary】香港嘅酒店自助餐虽然丰富，但食得多都会闷啦，所以餐厅不定期都会更新主题，而近期最能俘虏我个心，就系港威酒店Three on Canton嘅大排档打冷主题喇！虽然主打本土贴地路线，但打冷出品绝不马虎，加上海鲜、刺身、牛扒、羊脾等高质食材，选择应有尽有，非常丰富，性价比极高。
大排档自助餐
今次港威酒店Three on Canton嘅酒店自助餐以大排档打冷为主题，成为近期人气极高嘅酒店自助餐，想食嘅记住提早致电预订呀！
打冷
点解港威酒店Three on Canton嘅大排档打冷最能俘虏我个心？就系因为平时打冷嘅热门菜式都有齐，食得非常尽兴！肉嫩鲜甜嘅大眼鸡鱼、以浓郁秘制卤水汁熬制嘅卤水鸭片同潮州拼盘、香浓入味嘅韮菜猪红，仲有香辣弹牙嘅辣酒煮花螺。但讲到我嘅最爱，就系潮式蚝饼同蚝仔粥！两款嘅蚝仔份量都非常多：潮式蚝饼嘅蛋皮虽然未算松化，但蛋味香浓而蚝仔饱满鲜甜，充满口感；至于蚝仔粥虽然系饱肚之物，但粥底因为加入咗大量蚝仔、大地鱼等配料，所以粥底非常鲜甜，仲细心用埋大排档常见嘅碗，真系好味得嚟又可以打卡呀！
