【A&M Diary】食日本菜、意大利菜、西班牙菜等各国菜式，后面都唔会配上「大餐」呢个词；唯独优雅精致嘅法国菜，就评誉为法国大餐，代表世界顶尖嘅菜肴。但看似遥不可及嘅法国大餐，其实都有相对亲民价嘅选择！今次嚟到中环嘅La Brasserie，午餐有2道前菜，配搭1道主菜及甜品，抵食又好味！加上餐厅高雅嘅设计，让你投入细腻嘅法式美味。
Tartare de Boeuf
牛肉他他可以话系法国菜嘅经典菜式之一。La Brasserie嘅Tartare de Boeuf，混合咗唔同香料，令肉味香浓之外，仲非常嫩滑，放上脆薄多士上一齐食，两种口感，充满层次。
Les Huitres
法国盛产生蚝，所以法国大餐当然唔少得蚝啦。蚝身大大只，即叫即炸，炸皮唔厚够香脆，上面放有蛋黄酱调味。
Tataki de Thon
午餐嘅前菜，选择非常多，当中Tataki de Thon绝对系必点之选！呑拿鱼四边炙烧，中间保持生嘅状态，令呑拿鱼自身已带有两种口感，而且新鲜嫩滑。呑拿鱼上放有萝卜、青瓜、芒果莎莎酱和紫苏叶酱，成件事变得非常青新开胃。
Rillette de Saumon
米饼嘅摆盘好似云朵，口感香脆，食嘅时候当然要加上自家制嘅三文鱼酱。三文鱼酱非常creamy，巧妙地加入小香葱，令浓厚嘅酱变得清新，亦令味道加添了层次。
Salade Niçoise
香港人嘅小食前菜，鸡翼系最常见嘅选择；至于西餐嘅小食前菜，又点少得沙律呢？呢个沙律用生菜包住低温烹调嘅赤海鲔鱼，加上橄榄、蕃茄、及嚟自南法嘅尼斯配料和柑橘酱，非常新鲜开胃。
Gratin d’escargots
讲到法国菜，有点少得法式蜗牛呢！法式蜗牛新鲜软腍，完全无泥味。但每次食法式蜗牛，个重点自然会落咗去个薯蓉度。餐厅以整个烘锅烤焗，所以薯蓉吸收晒全部精华，又香又滑。
Beignet de Crab
炸到成个小馒头咁，原来大有乾坤。丝丝嘅蟹肉点上法式蛋黄酱，脆口又惹味。
Bahn Mi
前菜小食除咗法式嘅传统选择，仲有越式嘅法包！法包大大只，面包香脆松口，馅料有以鸡肝酱配上鸡肉丝、腌菜和新鲜蔬菜，口感丰富！
Entrecote
我哋4个人，share食咗8个前菜小食之后，已经非常满足，但其实主菜先啱啱登场。呢份牛扒采肉眼部位，肉味香浓，油香丰富，生熟度啱啱好。至于配菜就有铺面嘅炸幼薯条，比平时食开嘅薯条更香脆，超好味！
Loup de Mer
已去骨嘅鲈鱼啖啖肉，加上以烤焗煮法，带有焦香味，亦令鱼皮非常香脆。主厨特意唔用香浓嘅酱汁，并以榄榄油、蕃茄、小香葱等适量调味，更突显鲈鱼嘅鲜甜味。
Gambas
上碟大虾有两大只，肉质弹牙，虾头带有大量虾膏，非常鲜甜。餐厅特意用上芒果同红椒，除咗就令菜式嘅颜色更添丰富，攞盘精美之外，亦可减低油腻感，配搭得宜。
