【Viu】乐队ToNick今晚喺九展开骚，以「只准快乐」为主题，小龟自爆食米线遇见一位20岁妹妹话认得自己，原来妹妹嘅妈咪好钟意ToNick，引得全场爆笑！是晚，恒仔表现较沉默，献唱演唱会主题曲《Good Trip in Bad Days》时一度感触哽咽，话呢几年经历好多嘢，但无论开心与唔开心，好多事都要累积埋一齐先系完整人生。之后唱出《长相厮守》、《记得梳头》，以及歌颂成人电影网站嘅《This AV》等hit歌。
完骚后4子受访，恒仔透露女友Kylah Chan移民咗去加拿大，所以冇嚟睇骚，表示队友Ryan要移民时都好唔舍得，有一晚同Ryan讲：「你不如唔好走。」咁更何况系女友呢？难怪恒仔都话Long D嘅感情系需要时间去适应。而移英半年嘅Ryan就专登返香港开骚，话估唔到可以Long D夹band，迟啲大家去英国站开show，佢就已准备好喺屋企打边炉同烧嘢食招呼班兄弟。Encore环节，恒仔见歌迷反应热烈即除衫骚肌，但叫埋其他兄弟，就个个都净系话「撑你」，似乎冇乜实际行动，最终恒仔承诺4子如有机会喺红馆开骚就会四个一齐爆肌，到时一定好有睇头。想睇更多记得loop爆片。