【viu】娄峻硕、Ashley林恺铃、韩国真人骚《单身即地狱3》入面两大型男朴民奎同孙源翊，仲有日本时尚双胞胎「铃木姊妹」AMI、AYA现身尖沙咀出席展览开幕礼，型男索女吸引近百fans到场力撑，劲热闹！
最近成日嚟香港嘅娄峻硕再大晒广东话，咁啱兄弟「九泽CP」邱锋泽同陈零九听日（27日）喺香港开骚，莫非会上台做嘉宾？娄峻硕会点答？展览以花为主题，娄峻硕自认唔系浪漫嘅人，咁耐以嚟净系送过一次花畀未婚妻焦凡凡！佢又指仲未开始筹备婚礼，但就应该唔会闹交嘅，因为一切都会让凡凡，咁答想冧死人咩？至于6月嘅香港骚，娄峻硕就话准备紧，叫大家期待吓呀！
Ashley近日多咗个创作女歌手新身份，佢笑话宣传𠮶阵未试过咁紧张，特别喺拍MV好大压力！仲揾嚟George@P1X3L做男主角，Ashley怕丑话系自肥，咁下次会唔会揾绯闻男友Angus杨天宇做男主角呢？Ashley又话之后想同两位「镜仔」Ian、AK合作，可以写关于人生哲学主题嘅歌咁话！
两位韩国型男朴民奎、孙源翊都系首次来港，对香港嘅第一印象系好似身处喺电影场景咁，又话有睇开香港电影，一落机就去食黯然销魂饭，自称好钟意周星驰！之后仲想食点心、搭山顶缆车等！讲到佢哋喺《单身即地狱3》凭fit爆body成焦点，佢哋笑话依家冇晒啲肌肉，饿笃茄？另外，再嚟香港嘅铃木姊妹就话今次最想睇夜景，即刻去片听吓佢哋仲讲咗啲咩啦！