【A&M Diary】尖沙咀餐厅选择虽然多，但既系游客区又系商业区，晏昼食饭真系唔易揾位。嚟到位于广东道嘅鮨处松户，餐厅属于上楼餐厅，如果唔系有喺该区返工嘅朋友推介，我谂我都唔识嚟呢间充满和式风格嘅餐厅呀！
刺身定食
鮨处松户嘅午市套餐相当抵食，呢个刺身定食共有7款刺身，就连赤虾都有两大只！帆立贝鲜甜弹牙，加上油香丰富嘅油甘鱼，非常满足。
北海丼定食
午市定食除咗主菜之外，亦会配上香滑嘅茶碗蒸。北海丼配上五款鱼生，最正当然系份量十足嘅海胆，非常鲜甜，味道微甘，入口绵滑；至于赤虾劲多虾膏，肉身新鲜弹牙！
