【A&M Diary】大排档小炒风可以话系香港嘅地道美食代表！除咗充满镬气嘅小炒、焦香热辣嘅煲仔菜之外，当然唔少得𠮶种老香港人情味！嚟到沙田围嘅翠林餐厅，经济小菜自选套餐嘅价钱仲相当亲民，抵食之余仲有久违嘅大排档镬气呢！
金牌翠林小炒王
经济小菜自选套餐有26款小菜可供选择，根据人数选择2款、3款或4款小菜，选择多之余，𩠌菜嘅份量仲要大大碟呢！嚟到茶餐厅或者大排档，就一定会叫小炒王。翠林餐厅嘅金牌翠林小炒王，配料唔少得韮菜、虾干、鱿鱼、腰果。份量十足，送饭一流。
沙嗲金菇肥牛煲
打开煲盖已经闻到沙嗲汁好香，肥牛煮到软腍又入味，但讲到最正，当然系吸收晒沙嗲汁精华嘅粉丝啦，十分惹味。
椒盐鲜鱿
去大牌档呢种格局嘅饭店食饭，点少得椒盐鲜鱿呢！椒盐鲜鱿炸得好脆口，鱿鱼充满口感但完全唔韧，加埋上面配埋d炸蒜粒，香口之余，口感仲大大提升！
煎蚝饼
煎蚝饼系潮州版本，比较脆口。平时d芫茜只系放系蚝饼上方，而佢地会切碎加系蚝饼入面，更加容易食到芫茜香味。煎蚝饼嘅蛋香十足，而每粒蚝都仍然胀卜卜，无煎到干晒水呢！
相关内容