【A&M Diary】大窝口作为一个住宅区，如果无朋友住喺呢头，真系好少会涉足到呢个地方。但正正就系因为住宅区，所以区内其实有唔少街坊餐厅，大件夹抵食。嚟到悦知味中泰越风味融合菜，餐厅主打东南亚风味，让味觉一次过轻松畅游多个地方啦！
粉葛红萝卜蚝豉鲮鱼汤
除咗东南亚风味，餐厅亦有中式选择，其中包括老火汤！特别系出街食嘢食得多，有时都会挂住屋企嘅老火汤。悦知味中泰越风味融合菜每日都会提供唔同款式嘅汤水，是日就有粉葛红萝卜蚝豉鲮鱼汤，粉葛生津解渴，清甜嘅红萝卜配合蚝豉令汤头嘅鲜甜味得以提升，饮完真系滋润番晒！
沙嗲牛肉串烧、泰国杂锦小食拼盘
小食就拣咗泰国风味。沙嗲牛肉串烧嘅肉味相当丰富，加上酱汁，非常惹味；至于泰国杂锦小食拼盘就有常见嘅香脆嘅鱼饼、虾饼同春卷之外，仲有河豚干呢！河豚干香脆惹味，食落充满鱼味，送酒一流。
越南鲜虾芒果米卷
另外，作为越南代表嘅越南鲜虾芒果米卷亦无令人失望。香口嘅虾干配搭味道清新嘅青瓜丝同萝卜丝，令呢份春卷口感非常丰富。而作为主角嘅鲜虾相当鲜甜弹牙，同酸甜嘅芒果好夹。点埋泰式甜酸汁，非常醒胃惹味。
