【Viu】香港电台举辧「第45届十大中文金曲」颁奖典礼今晚喺九展圆满结束，MC张天赋横扫五奖成大赢家，与Gin Lee分别夺得「最优秀流行歌手男/女大奖」，MC以《世一》歌词形容当刻心情，话多咗份责任感。今年表演嘉宾有超火辣嘅DJ Soda，问MC使唔使目不斜视？佢好坦白话：「咁性感有留意。」仲好自信对方可能揾自己集邮添。
好兄弟洪嘉豪则凭《只要你不尴尬》得十大中文金曲，直言已经好耐冇攞奖，能够喺九展拆卸前再上台，佢话勾起好多回忆。嘉豪透露嚟紧会将红馆演唱会搬到澳门舞台，问到使唔使keep住小蛮腰，佢话为瘦身搞到个人太虚弱，连院友都戥佢心痛，但就唔使换过批衫，只要着返件打底衫已Ok,系有计嘅。对于好友AK嘅绯闻，嘉豪就避而不谈。
多栖发展嘅Sica拎咗「最有前途新人」金奖，佢话自己最有前途应该系个银包，猪笼入水㖞。九展同样令Sica勾起好多回忆，早前佢就以「明日香」造型参与最后一届RG，真系好应景。虽然系搞笑，但由十年前喺九展玩Cosplay到依家，见返好多朋友仔，Sica都话忍唔住眼湿湿。佢仲透露日前被蚊咬搞到只眼得返一条线嘅「遇袭」经过。
另外，刚与破产男友分手嘅JW，否认系拜金女，最重要家人同朋友明白，日前同大家庆祝34岁生日，唔心急拍拖，但因为好钟意小朋友，所以早前已雪卵做准备。而Dear Jane嚟紧组队20周年，将有连串嘅企划，咁丰富访问内容，记得要睇足本访问。