梁思浩主持的网台节目《娱乐好好玩》，近日请来好友吴家乐做嘉宾，去年底宣布与无线结束30年宾主关系的他，在节目上亦相当敢言。炎明熹（Gigi）近日盛传离巢，电视广播有限公司助理总经理（艺员管理及发展）乐易玲日前现身另外两位《声梦》小花钟柔美、詹天文的演唱会加场活动，语带双关提两位「唔好忘本！」吴家乐就回应了她的一番话，认为炎明熹冇违反合约精神，相信是TVB开出的条件不够优厚，又谓：「我哋唔系同你共度时艰咩？到最尾有几多Artist默默俾人放走咗，转行揸的士，约又唔同佢倾，你又唔同佢讲话『你哋都唔忘本㖞，TVB继续养你啦！』」

近日炎明熹离巢风波闹得沸沸扬扬，日前声梦小花姚焯菲、钟柔美、詹天文的音乐会宣布加场，无线高层乐易玲致辞时语重心长表示：「我觉得你哋要珍惜呢个机会，呢啲小朋友，由13岁开始睇住你哋大，依家已经变成美少女。」 然后话题一转，吩咐两位唔好忘记初心：「就算将来大家一齐打歌时，会有竞争，要记住你哋都系一班好嘅兄弟姐妹，要相亲相爱，要记住唔好忘本，呢个系我哋做人嘅⋯⋯不过佢哋真系好乖，可以做到。」疑似暗寸炎明熹忘本。

炎明熹近日屡被指因不肯续约而遭TVB雪藏，昨日（30日）她出席商场活动时，TVB更罕有地冇派员采访，更有Fans指Gigi昨日打扮随意，戴Cap帽头发又乱，质疑公司是否连化妆师、发型师等都冇安排给她。梁思浩、吴家乐在《娱乐好好玩》节目上，多次提到「唔好忘本」论，并提到乐小姐名字。其中一部份，吴家乐问：「你同乐小姐破冰未？」梁思浩：「我从来冇同佢唔啱。」吴家乐：「你讲大话！」梁思浩：「我最近一个访问都有讲，可能我而家修行紧，我任何人都觉得系好人。」

梁思浩大赞新一代之中睇好魏浚笙和炎明熹会是下一位巨星，指二人站出来都会有星光，讲到炎明熹的合约问题，近日「乐坛风纪」甄妮姐姐都有发声，表示：「文明到上太空了，大台还动不动就以『雪藏』做威胁，十分不厚道，已不再是1980年的覇气台，独一无二！又不是卖到『青楼』，起码有钱还可以『赎』身，坐下好商量嘛！冻什么冻。对有潜力的小朋友是要多培训，多给机会才是，弄一堆有年纪的在玩什么把戏？自娱？能玩多久？😨😨不解」梁思浩认为这番说话，对新生代好啱听。

而吴家乐力撑Gigi冇忘本，他说自己有意见，但预了讲完会被「插」，他说：「前几日记者会，两个小妹妹嚟紧演唱会加场，有位前辈，你个friend，讲讲吓嘢就话『你两个就乖喇，做人最紧要唔好忘本。』我又觉得首先炎明熹有冇违反合约精神先？炎明熹喺合约期间履行晒佢嘅责任，合约完咗之后人望高处，你又唔知呢间公司畀咩Offer佢，同埋如果你谂住捧佢、将来有咩发展，晨早揾佢倾啦，点会一路拖拖拖拖拖，拖到埋尾先话倾唔掂，呢个系幕后一班工作人员嘅责任。」梁思浩认为是艺员部责任。

吴家乐续说，就算换公司内不同人与Gigi倾约，到头来条件亦是一样，又表示：「条件如果符合到佢要求，老实讲一个妹妹仔去到呢个位，梗系希望再远啲，玩游戏你唔系奖金就奖品，你其中一样多啲，佢咪留低啰。咁人哋可能出面Offer多好多，机会大啲，我觉得唔系忘唔忘本。」梁思浩表示自己愿意陪吴家乐一齐俾人闹，他说：「我唔系畀意见呢个艺员经理，但系炎明熹你系值得畀好啲嘅条件佢，好多歌星前辈都赞佢系好多年都未试过有呢个Talent嘅新人，唔应该用一般妹妹仔嘅待遇去对佢。」

吴家乐之后的一番话，似乎有怨气之余，亦为其他旧同事出头，他说：「唔好话忘唔忘本先，你（梁思浩）入嚟TVB之前，你喺唔同电台做过，我就讲森美大哥，佢入嚟TVB之前咪喺其他台做，过冷河都唔使就入嚟TVB，唔通你TVB同佢倾嘅时候，又会讲：『嗱，森美，你入嚟呢个台就忘本喇，你应该留返喺有线，你忘本呀。』咩忘本、合约精神，唔好讲埋啲废话啦，我预咗俾人插，之前话市道唔好、共度时艰，又话无言感激，我谂好多artist听到都知我讲紧咩，我哋唔系同你一齐共渡时艰咩？到最后尾有几多个Artist默默地俾人放走咗，转行揸的士，约又唔同你倾，你又唔同佢哋讲话『你哋都唔忘本㖞，我哋TVB继续养你啦！』又唔见你咁讲？你觉得佢值钱，有利用价值，值钱就话人哋忘本，几多人黯然咁离开呢间公司先？」梁思浩都认为公道，不止一次叫TVB用更优厚的条件留住对方。