首頁 | Now 新聞 ( ) • 2022-10-02 17:43

【A&M Diary】香港人真系好钟意食米线,所以我哋相信每一区都会有一间米线嘅代表作。继上次试完屯门在地人介绍嘅云贵风,今次就轮到住喺湾仔嘅在地人介绍我哋去试试成都小巷。原来成都小巷除咗米线,夜晚仲有鸡煲食添㗎!不过,今次午餐嚟到,我哋就先试吓佢哋嘅米线啦!

成都小巷嘅汤底选择好多,但最惊喜都系佢嘅配料,以湾仔区嚟讲,HK$5就有一个配料,价钱真系超抵,而且选择又多!

M佬之选:鸡肉片+萝卜麻酱小酸辣米线
米线嘅配菜有芽菜、花生、芝麻、韮菜、酸菜同肉碎,汤底仲有浓香麻酱味,够晒惹味。而配料方面,M佬就拣咗鸡肉片同萝卜,两款都系HK$5,而且份量超多,好抵食!萝卜仲新鲜冇渣,够晒鲜甜。

A姐之选:麻辣腩肉+鸡肉片+牛肉片重庆中酸辣米线(走芽菜)
酸辣米线一直都系我嘅最爱,呢碗酸辣米线嘅配菜有芽菜、花生、韮菜、酸菜同肉碎。肉食兽嘅我,一次过叫晒鸡、牛、猪,而当中嘅麻辣腩肉系超惊喜,3大块厚切嘅腩肉,够晒入味!而鸡肉片同牛肉片都各系HK$5,份量超多,好抵食!而汤底酸辣比例啱啱好,正!