【A&M Diary】平时大家行山打卡都系以大自然风景为主，原来香港都有唔少军事级数嘅打卡景点架！今日我就带A姐嚟到粉岭嘅皇后山打卡，唔好听到个山字就以为有排行，其实识行或者跟住我哋以下嘅行程，唔洗5分钟就会去到香港少见，以莲花形状为外观嘅印度庙同皇后山军营喇！呢度充满荒废感，啱晒大家影相打卡架！
提提你
1. 起点设有洗手间及补给站，请带备足够嘅饮用水前往
2. 大家记住保持环境清洁，自己垃圾自己带走，绝对唔可以破坏大自然环境
3. 所有宗教场所都系一个庄严嘅地方，游览时保持声浪，尊重自己，尊重宗教
4. 部份登山小路略为隐蔽，路况稍斜而且多碎石，但整体嚟讲，难度唔算高，但都要量力以为呀
5. 印度庙及军营蚊虫众多，应做足防蚊措施
前往方法
1. 由粉岭港铁站乘坐52B往鹤薮小巴，喺布格仔路落车
2. 落车后，沿村路行，直至见到布格仔公厕，后方就有一条小路登山
3. 参观完后，沿路往返
皇后山印度庙
呢座皇后山印度庙被评为三级历史建筑物，更加系全港唯一以莲花形状兴建嘅建筑物，加上一啲都唔难行，所以成为大家近期嘅打卡热点。
要前往皇后山印度庙其实一啲都唔难，首先揾咗流水响布格仔公厕。面对住公厕嘅左手边，会有丝带提醒你入口位置。大家要先穿过铁丝网，然后沿铁丝网一直行，大家一定要记住系沿铁丝网行，千祈唔好跟丝带，因为有啲丝带会系另一条上山/落山路线嘅提示。铁丝网嘅路线微斜，仲有啲碎石，而铁丝网嘅另一边就系皇后山公营房屋，但千祈唔好怀疑自己（我哋就同好多同路人一样，误信上山/落山嘅丝带，最终荡失路，行咗半个钟都揾唔到），但其实沿铁丝网行5分钟就会去到皇后山印度庙喇！
皇后山印度庙建于1960年代，被列为是三级历史建筑物，主要为驻守皇后山军营嘅尼泊尔踞喀兵而建造，直至回归前啹喀兵撤走，呢座印度庙就荒废喇！保留落嚟嘅印度庙形状呈六角形，内外以青蓝色为主，而神坛位置就以红色主打。至于顶部有六个尖顶，由12个三角形砌成，成为象征美丽同神圣嘅莲花形状，充满啹喀特色。
皇后山军营
喺皇后山印度庙嘅后面，会有一个簷篷，沿簷篷行荒嘅路，再上20级楼梯左右就会去到皇后山军营喇！
皇后山军营原本为驻港英军营房，依家喺荒废嘅军营入面，我哋仲见到办公室同宿舍。但其实全盛时期嘅皇后山军营，占地相等于维多利亚公园，建有约20座嘅绿色平房，亦有办公室、宿舍、戏院、加油站、操场、篮球场及草地，并由尼泊尔踞喀兵驻守。直至回归后，曾改建为警犬队总部、调查训练学校同警察康乐中心。直至2003年新嘅警犬队总部成立，丢空至今。
