【Viu】第二届《香港社交媒体风云榜》今日喺海港城举行颁奖礼，谢安琪（Kay）、张继聪、陈柏宇（Jason）、苏皓儿、试当真许贤、阿慈同蓝仔头等都有出席。张氏夫妇除咗各自有奖攞，仲系最多互动嘅得奖者，Kay搞笑话平日同阿聪好少互动，早前情人节𠮶条穿搭片都应该系只此一次。阿聪喺台上公然话要买多几架电单车拍片，访问𠮶阵问Kay准唔准老公买车，佢即刻忍唔住反晒白眼，扮斗气冤家。
讲到佢哋会唔会合体开骚，阿聪话自己仲系乐坛新人：「自己赞助自己唱歌，我要喺乐坛努力啲先可以同贵为天后级嘅阿Kay唱歌。」Kay又忍唔住反白眼，两公婆真系好搞笑。
Jason同试当真合作拍综艺大受欢迎，曾经畀人影到访问𠮶阵冇拉裤链嘅佢，喺访问期间发现有记者冇拉裤链：「仲唔畀我捉到你哋！」搞到现场个个都笑唔停。至于熊仔头早前宣布休息，蓝仔头做访问𠮶阵就笑言自己终于可以上位，同时亦有交代咗熊仔头嘅近况。