【Viu】台湾天团五月天一向劲宠香港「五迷」，每年坚守「五月之约」嘅约定嚟香港开骚！不过今年巡唱香港站头场日子定喺寻晚4月30日，五子搞笑形容为「五月之约抢先场」，其实你哋几时嚟香港开骚，五迷都绝对无任欢迎呀！
事隔一年再见香港五迷，五子笑话开骚前个感觉都唔太真实，直到真系踩上舞台就好sure身在香港，特别系成员玛莎，佢大笑话由唱第二首歌开始就全身湿透，爆汗劲sexy，呢个就系香港专属嘅湿热天气！
呢次五月天一共会开7场中环海滨骚，五子指呢段时间都会stay喺香港，成员冠佑话出街会有五迷同佢挥手，主音阿信即刻笑问系咪喺餐厅？系咪想叫话帮手埋单？笑cry呀！
适逢五月天今年出道25周年，佢哋以时光机做概念，同五迷去返以前，热唱多首经典金曲，送五迷惊喜！献唱《恋爱ING》时，佢哋仲坐住一部红色辣跑，驶出台前劲近五迷，令全场2万五迷high爆齐喊：「LOVE！」当然唔少得点歌环节，唔少五迷落足心机整banner吸引五子注意，成功点唱《勇敢》、《好不好》、《彩虹》、《后青春期的诗》4首歌！另外，虽然天文台预告会落雨，但大半场骚都劲好天，五子自爆劲担心天气，一直都避开唔讲个「雨」字，不过到最后都走唔甩，撞正黄色暴雨警告信号，首场个唱喺暴风雨之雨提早结束！
相关内容