【A&M Diary】食完饭就梗系要食甜品，呢一餐先会变得完美。讲到港式甜品，过往嘅甜品店就推出唔少人气嘅经典配搭，而我最钟意嘅就系龙眼椰果冰。本以为呢个味道已经成为集体回忆，但聪哥聪嫂喺湾仔开设聪。C Dessert，让我哋嘅味蕾能够再次品尝久违嘅美味。
龙眼椰果冰
用咗好多嚟自泰国嘅新鲜龙眼打成，所以味道非常清甜，系消暑解渴嘅一流选择。另外，加上椰果同西米，增加整体嘅口感，绝对系保持住昔日嘅味道。
士多啤梨豆腐花
龙眼椰果冰以外，士多啤梨豆腐花系聪。C Dessert嘅另一经典名物。滑溜嘅豆腐花上面铺满由新鲜士多啤梨调制而成嘅士多啤梨酱，食落嘅感觉好似士多啤梨嘅乳酪雪糕，加埋豆腐花一齐食，推上另一层次。
芒芒丽莎
芒果绝对系港式甜品嘅常客，所以喺聪。C Dessert又点少得芒果系列呢？其中芒芒丽莎就系我哋嘅心水推介，以芒果蓉作基底，加上芒果果肉、西米、椰果、芒果冰等，味蕾喺芒果嘅鲜甜同冰凉口感下，达到飞起嘅感觉。
椰汁椰果西米露
以为聪。C Dessert只系以新兴嘅港式甜品作招徕？其实呢度仲有唔少传统嘅糖水、炖品架！由于之前嘅甜品选择都系加入咗水果，所以我哋叫咗一碗相对单调嘅椰汁椰果西米露，喺无水果嘅衬托下，反而能够品尝到西米露嘅功夫呢！西米软滑、椰汁香浓、椰果口感，简单得嚟又会有惊喜。
